Ikaslinux

Gnomeren panelak nola konpondu.

2011-03-14T02:56:00.000-07:00

Lortu dut!
Nire Gnome mahaigainaren panelek kraska egin zuten, konkretuki, beheko panelean martxan dituzun aplikazioak adierazten dizu Gnomek eta honetan, ez dakit zergatik, ez zen ezer agertzen, beraz, leihoren bat minimizatutakoan, desagertu egiten zen beste barik, gero ezin berreskuratuz.
arazo hau behin baino gehiagotan gertatu zait, baina (azkenean!) konponketa erreza topatu dut helbide honetan http://www.tribulinux.com/como-volver-los-paneles-de-gnome-estado-original.html eta azalduko dizuet pausuz pausu:

- Terminalean honako agindua exekutatu:

gconftool-2 --recursive-unset /apps/panel

- Ondoren, exekutatu:

rm -rf ~/.gconf/apps/panel

- Eta azkenik exekutatu honako agindu hau:

pkill gnome-panel

Eta panelak berrabiaraziko dituzu.

Badakit ez dudala bolbora bustia asmatu, baina niri suertatu zaidan bezalaxe, zuentzat ere baliagarria izatea espero dut.

Eta ordenagailuak zertarako?

2010-05-06T09:05:00.000-07:00

Aurreko azteazkenean gelako bilera izan nuen nire ikasleen gurasoekin. Amaitutakoan, ama batek galdetu egin zidan nahiko kezkati ea noiz hasiko ginen ordenagailu txiki horiek (notebook-ak) erabiltzen. Tramankulutxo horiek testu-liburuen ordez erabiliko genuelakoan zegoen eta behin hasita ikasleak jo ta su hasiko zirela internet-en bidez euren gelako zein etxeko lanak egiten. Hori guztia zeukan buruan bere alabaren gelara ordenagailu txiki bana eta PDI-a heldu zaizkigulako. Honek zer pentsa eman zidan... Zuri ez?
Ikasle batek arazo akademikoak baditu, IKT-en bidez dana konponduko da, ahalegin handirik egin gabe eduki guztiak gaindituko dituzte atoan eta, zer esanik ez, nota txarrak ez ditugu ipini beharko gehiagotan. Pedagogiak mendeetan erantzuna eman nahi izan dion arazoak konpondu ditugulakoan dago jende asko. Ados, larregikeria gehiegi ipintzen ari naiz eta zu, irakurle, ez zaitut galdu nahi.
Harira. Herritar arruntak berrikuntza pedagogikoa ordenagailu horniketarekin nahasten du, hori oker larria da eta horrela aldarrikatu behar dugu irakaskuntza lanean ari garen guztiok. Baina oso normala da nire ikasleen gurasoek horrela pentsatzea, horrela sinestarazi egin diotelako beren probetxu politikorako IKT horniketa "miresgarri" hau eskoletara ekarri diguten horiek, betiko horiek, eskolarekin txintik hitz egin gabe.
Euren benetako interes "pedagogikoetan" sinisteko betarik eman digute inoiz?

Badugu arbela berria gelan!

2010-05-05T05:28:00.000-07:00

Zein polita! Zein bitxia! Azkenean heldu zaigu PDI berria, Eskola 2.0koek ekarria! eta danok oso pozik gaude gelan.
Egia esan, aspaldi nengoen ezertxo ere ipini gabe blog honetan, lotsatuta azkenean, eta gertaera berri honek abagune ezin hobea ekarri dit zuekin hausnarketa pare bat plazaratzeko.
Euskadiko Hezkuntza Sisteman, betidanik, gauzak arinegi eta gehiegi planifikatu barik egin ohi dira. Kontseilaritzak nork duen, putz egiten duen aldera denok!
Oraingoan buru "argitsu" bati bururatu zaio IKTen asunto honek ondo "janzten" duela bere agintaldia eta Euskadiko eskola guztiak buru belarri PDIak, Netbookak, ... erabiltzen, 13.000.000 € gastatuta "nik esaten dudalako"-az aparte, beste inolako arrazoirik gabe.
Barkatuko didazue, baina ez nago ados, irakasle-IKT-zalea naizen aldetik, hain zuzen ere.
"Beste modu batean egin zitekeen".
Ez nauzue ados, bi arrazioengatik:
A. Orain planteatzen diguten eredu honekin azalean geratuko garelako beste behin ere. Oso teknologia garestiak sartu dituzue klasean, ordenagailu eramangarri piloa, baina eguneroko lanean hori nola txertatu, hots alderdi didaktiko-pedagogikoa umezurtz utzi duzue. Norbaitek imajina dezake Navalen Izugarrizko itsasontzi bat egin baina gero bertan ezer garraiatzeko izan ez? Horrela ikusten dut nik gutxi gora behera asunto hau: ordenagailuak, tresnak, tramankuluak... baina zertarako?

Hori bai, gaur Jaurlaritzan dauden politikarientzat primeran etorri zaie diru-xahutze hau, aurrekoek baino gehiago "egiten dutela" erakusten digutelako herritar tonto guztiei eta enpresa baten batentzat negozio aukera paregabea izan delako. Enfin, herriarentzat herririk bage ari garelako berriro ere lur santu honetan.

Nire uste apalean, lehen proposaturiko "IKT ikastetxe eredua" egitasmoa logikoagoa zen (azterketak kenduta, noski) eta ikastetxeetan txertatzeko aukera gehiago ematen zuen, Euskadi ikastetxeen ezaugarriak oso anitzak dira-eta.

B. Software librea? Bai, baina pasatu gabe, eh? Egia esan ordenagailuetan Ubuntu zahar bat instalatzea "puntazo" bat izan da, bana hor geratzen da dena. Smart arbela erabiliko dugu eta hor sortzen diren aplikazioa pribatiboak dira. PDIren instalakuntza Window$-ekin ikasi dugu (dinamizatzaileari esker, linux-en ere!).

Dena dela, formazioa eman gabe, irakasleak eta ikasleak Linux erabiltzen hasiko dira?

Horra hor neure zalantzak eta iritziak.

Eta hurrengoan euskarari buruz egingo dugu berba!

Zer da WEB 2.0 delako hori?

2008-06-03T07:06:00.000-07:00

Hona hemen aurkezpen polit bat:

| View | Upload your own

Hain da zaila Ubuntura salto egitea gure ikastetxeetan?

2008-02-21T14:29:00.002-08:00

Euskadi Autonomi Erkidegoko eskoletan Windows da nagusi.
Premia plana inplementatu zenean, argi eta garbi izan genuen zein izango zen Eusko Jaurlaritzaren Hezkuntza Sailaren politika alor honetan: ikastetxe guztietan sare informatikoa, zerbitzariak Windows 2000, postuetako SEak W98 eta wXP, aplikazioak: MS Office, Explorer, ...
Den dena lotuta hasiera hasieratik Micro$oft-en sofware pribatiboarekin, eta urtero urtero Hezkuntza Sailak miloak eta miloeak ordaintzen "erlijiosoki" lagun amerikarrari. Bada, milioi horiek Eskola Publikoaren azpiegiturak hobetzen erabil zitzaketen!
Nik neuk neure gelan (LH 6. maila) ohiko WXP-az aparte, gurasoek emandako bi makina zaharretan Ubuntu 7.10 ipini dut: PII batean Fluxbuntu distroa eta PIII batean Xbuntu. Den dena 0 €-ren truke!

Hasieratik sortzen zitzaidan beldurra eta zalantza ikasleen erantzunarena izan zen. Hots, ez ote zuten jakingo erabiltzen edo bilatzen beharreko programarik, gauzak gordetzeko zailtasunik ote zuten, etab. Baina, egia esateko, inolako konplexurik gabe makinaren aurrean jarri eta neronek ezer esan gabe Firefox web arakatzailea topatu zuten eta gelako artatzapinueta.org blogean sartu eta testuak idazten hasi ziren.

Geroago, hori bai, gainontzeko aplikazioak, Abiword, Tuxpaint, etab. non dituzten eta fitxategiak modu lokalean oraingoz non gorde azaldu behar izan nien, baina hau guztiak 10' baino gutxiagoko gauza izan zen. Hortik aurrera, abian. Eta klasean 3 ordenagailu daukat dagoeneko.
Hurrengo postetan azalduko dizuet, norbaitek interesik izango duelakoan, nola egin nuen saretxoaren muntaketa gelan.